ஜுன்ஜுனு: இந்தியாவில் படைப்பு சுதந்திரம் பாரம்பரியமாக இருந்து வருகிறது, ஆனால் யாரும் யாருடைய மத உணர்வுகளையும் புண்படுத்தக் கூடாது என்று ஆர்எஸ்எஸ் அகில பாரதிய பிரச்சார் பிரமுக் ஸ்ரீ சுனில் அம்பேகர் கூறினார். இது தொடர்பாக அனைவரும் கவனமாக இருக்க வேண்டும் எனவும் அவர் மேலும் தெரிவித்துள்ளார். உலகெங்கிலும் உள்ள இந்து பக்தர்களின் உணர்வுகளை புண்படுத்தும் வகையில் காளி தேவி சிகரெட்டை புகைப்பது போன்ற ஆவணப்படம் போஸ்டரில் எழுந்த சர்ச்சைக்கு அவர் பதிலளித்தார். ஸ்ரீ சுனில் அம்பேகர் ராஜஸ்தானின் ஜுன்ஜுனுவில் மூன்று நாள் அகில பாரதிய பிராந்த பிரசாரக் கூட்டத்தில் செய்தியாளர்களிடம் பேசினார்.
உதய்பூரில் இந்து தையல்காரர் கன்ஹையா லால் தலை துண்டிக்கப்பட்டதைக் கண்டித்த ஆர்எஸ்எஸ், இந்தச் சம்பவத்தைக் கண்டிக்குமாறு முஸ்லிம்களைக் கேட்டுக் கொண்டது. ஸ்ரீ சுனில் அம்பேகர், இந்த கொடூரமான குற்றத்தால் இந்துக்கள் கோபமடைந்துள்ளனர் என்று கூறினார். “உதய்பூர் கொலையில் எழுந்த கண்டனமும் குறைவு. உதய்பூர் கொலைக்கு எதிராக முஸ்லீம் சமூகமும் முன் வந்து குரல் கொடுக்க வேண்டும்,” என்று அவர் மேலும் கூறினார்.
நுபுர் ஷர்மாவுக்கு கொலை மிரட்டல் விடுக்கப்பட்ட விவகாரம் குறித்து சுனில் அம்பேகர் கூறுகையில், “சில நாட்களாக மக்களுக்கு மிரட்டல்கள் விடுக்கப்படுவது தொடர்கிறது. நீங்கள் ஒருவருடன் உடன்படவில்லை என்றால், அமைதியான முறையில் போராட்டம் நடத்த வழிகள் உள்ளன. ஒருவரைக் கொல்ல யாருக்கும் உரிமை இல்லை.
மத உணர்வுகளை புண்படுத்தியதாக சர்ச்சைக்குரிய படத்தின் இயக்குனர் (லீனா மணிமேகலை) மீது பல வழக்குகள் பதிவு செய்யப்பட்டுள்ளன. திரிணாமுல் காங்கிரஸ் நாடாளுமன்ற உறுப்பினர் மஹுவா மொய்த்ரா, சுவரொட்டி குறித்த சர்ச்சை குறித்து கேள்வி எழுப்பிய போது, காளி தேவியை அவமதிக்கும் வகையில் கருத்து தெரிவித்ததால், பிரச்சினை மேலும் வெடித்தது.
ஜூலை 7-9 வரை ஜுன்ஜுனுவில் அனைத்து பிராந்த பிரசாரக் கூட்டம் (அகில் பாரதீய பிராந்த பிரசாரக் பைடக்) நடைபெற்றது. 11 க்ஷேத்திரங்களின் (பிராந்தியங்கள்) ஷேத்திர மற்றும் சஹ க்ஷேத்ர பிரசாரக்களும், 45 பிராந்தங்களின் பிராந்த மற்றும் சஹ பிராந்த பிரசாரக்களும் கூட்டத்தில் கலந்து கொண்டனர். ஆர்எஸ்எஸ் சர்சங்கசாலக் டாக்டர் மோகன் பகவத் மற்றும் சர்கார்யவாஹ் ஸ்ரீ தத்தாத்ரேயா ஹோசபாலே மற்றும் ஐந்து சஹ சர்கார்யவாக்கள் மூன்று நாள் கூட்டத்தில் கலந்து கொண்டனர்.
