சென்னையில் ஒரே நாளில் 1,667 பேர் இரத்ததானம்: உலக சாதனை பதிவு
சென்னை, ஜனவரி 5: RSS-HSS இரத்ததானிகள் பிரிவு (Blood Donors Bureau) நடத்திய மாபெரும் இரத்ததான முகாம் உலக சாதனை படைத்துள்ளது. சென்னை மாநகரில் ஒரே நாளில் 34 இடங்களில் நடைபெற்ற இந்த முகாமில் 1,667 பேர் இரத்ததானம் செய்துள்ளனர்.
இன்று (05.01.2025) நடைபெற்ற இந்த விரிவான இரத்ததான முகாம், பல்வேறு சமூக சேவை அமைப்புகள், பள்ளிகள், கல்லூரிகள் ஆகியவற்றின் ஒத்துழைப்புடன் நடத்தப்பட்டது. RSS-HSS ஸ்வயம்சேவகர்களின் அயராத முயற்சியால், மொத்தம் 2,750-க்கும் மேற்பட்ட தன்னார்வலர்கள் முகாம்களுக்கு நேரில் வந்து பதிவு செய்தனர். அவர்களில் 1,667 பேர் இரத்ததானம் செய்தனர்.
இந்த சிறப்பு சாதனையை அங்கீகரிக்கும் விதமாக, உலகளாவிய சாதனைகளை பதிவு செய்யும் NOBEL WORLD RECORD அமைப்பு இதனை உலக சாதனையாக அங்கீகரித்து, சான்றிதழ்களும் பதக்கமும் வழங்கியுள்ளது.
சென்னை மாநகரின் பல்வேறு பகுதிகளில் அமைக்கப்பட்ட 34 முகாம்களும் சிறப்பாக நடைபெற்று, இந்த மாபெரும் சாதனைக்கு வழிவகுத்தன. பல்வேறு சமூக அமைப்புகளின் ஒருங்கிணைந்த செயல்பாடும், பொதுமக்களின் ஆர்வமுள்ள பங்கேற்பும் இந்த வெற்றிக்கு முக்கிய காரணங்களாக அமைந்தன.
