தேசிய பாதுகாப்பு விழிப்புணர்வு மன்றம் (எப்.ஏ.என்.எஸ்) ஏற்பாடு செய்திருந்த ‘ஆசாதி@75’ சிறப்பு நினைவு சொற்பொழிவில், மூத்த ஆர்.எஸ்.எஸ் பிரசாரககர் மற்றும் தேசிய செயற்குழு உறுப்பினருமான இந்திரேஷ் குமார் சிறப்புரை ஆற்றினார். அதில் அவர், அனைத்து குடிமக்களுக்கும் நீதியை உறுதி செய்வதற்காக ‘ஒரே நாடு ஒரு சட்டம்’ என்ற கருத்தை வலியுறுத்தினார். “பூமியில் உள்ள ஒவ்வொரு தேசமும் அதன் மக்களை நிர்வகிக்கும் ஒரே நாடு ஒரே சட்டம் என்ற இந்த விதியைக் கொண்டுள்ளது. நமது பன்முகத்தன்மையைக் கொண்டாடுவதன் மூலமும், ‘ஒரே நாடு, ஒரே சட்டம், ஒரே மக்கள்’ என்ற கருத்தை நிலைநிறுத்துவதன் மூலமும் நாம் முன்மாதிரியாக இருக்க வேண்டும். நமது ஒற்றுமையின் பிணைப்பு பாரதம், இந்தியத்துவம், ஹிந்துஸ்தானி, பாரதீயன், இந்தியன் என்ற மிகச்சிறந்த அர்த்தத்தில் உள்ளது. நம் நாட்டில் வெவ்வேறு மதங்கள் மற்றும் அவர்களைப் பின்பற்றுபவர்கள் இருக்கலாம். மேலும் சுரண்டல் மற்றும் அநீதிக்கு கூட வாய்ப்பு உள்ளது. ஆனால் முழு உலகிலும் அனைத்து மதங்களையும் கலாச்சாரங்களையும் மிகவும் இணக்கமான முறையில் கொண்டாடும், ஏற்றுக்கொண்டு மதிக்கும் ஒரே நாடு பாரதம் மட்டுமே. எனவே, ‘ஒரே நாடு ஒரே சட்டம்’ அல்லது உலகளாவிய சிவில் சட்டத்தை அமல்படுத்துவது நாட்டை அமைதியானதாக மாற்றும்” என்றார் இந்திரேஷ் குமார்.
பேராசிரியர் மஜார் ஆசிப் பேசுகையில், பொது சிவில் சட்டத்தின் முக்கியத்துவத்தையும், ‘ஒரே நாடு ஒரே சட்டம்’ நமது சமூகத்தில் இருந்து, குறிப்பாக முஸ்லீம் சமூகத்திலிருந்து நீக்கக்கூடிய பல்வேறு பிரச்னைகளையும் அடிக்கோடிட்டுக் காட்டினார். நீலம் சி டே தனது உரையில், பொது சிவில் சட்டத்தின் முக்கியத்துவத்தை வெளிச்சம் போட்டுக் காட்டினார், மேலும் கிறிஸ்தவ சமூகம் தொடர்பான பெரும்பாலான சட்டங்கள், ஏற்கனவே ஒரே நாடு ஒரே சட்டக் கோட்பாட்டின் படியே உள்ளன என்று விளக்கினார். இது சமூகத்தில் பெண்கள் அதிகாரம் மற்றும் வளர்ச்சிக்கு வழிவகுக்கும் என்ற உண்மையையும் அவர் எடுத்துரைத்தார். பேராசிரியர் (டாக்டர்) மனோஜ் கே சின்ஹா தனது விவாதத்தில், பிரதமர் நரேந்திர மோடியின் முன்முயற்சிகளுக்காகவும், ‘ஒரே பூமி, ஒரே குடும்பம், ஒரே எதிர்காலம்’ என்ற கருத்தை முன்வைத்ததற்காகவும் பாராட்டினார். சமூகம் ஒரு சட்டத்தைக் கோரும் போது அது சிறந்த, பயனுள்ள வழியில் பரவுகிறது. எந்த ஒரு பிரச்சினைக்கும் அமைதியான முறையில் தீர்வு காண்பதே முன்னோக்கி செல்வதற்கான சிறந்த வழியாகும். அதிகரித்து வரும் பயங்கரவாத பிரச்சினைக்கு எதிராக ‘ஒரே உலகளாவிய சட்டம்’ அவசியம் என்பதை அவர் எடுத்துரைத்தார். சமூகத்தின் ஒவ்வொரு பிரிவினரையும் நம்ப வைப்பதே பொது சிவில் சட்டத்தை அமல்படுத்துவதற்கான சிறந்த வழி என்று அவர் சுட்டிக்காட்டினார்.
